Hákon Hrafn Sigurðsson
Um þig – Hvað heitir þú, hvað ertu gömul og hvað ertu að gera í lífinu?
Ég heiti Hákon Hrafn Sigurðsson, er 52 ára gamall og starfa sem prófessor við Lyfjafræðideild Háskóla Íslands. Ég er einnig í hlutastarfi sem þjálfari hjá Breiðabliki, bæði í hjólreiðadeild og þríþrautardeild, og hef mikinn áhuga á þjálffræði.
Íþróttin – Hvenær byrjaðir þú að hjóla og hvernig kviknaði áhuginn?
Ég hafði alltaf gaman af því að hjóla þegar ég var yngri, en æfði aðallega frjálsar íþróttir sem unglingur. Ég keypti mitt fyrsta Trek fjallahjól árið 1996, sem ég á enn í dag, og Trek götuhjól árið 2001. Þá má segja að ég hafi byrjað að æfa hjólreiðar af einhverju marki, þó fyrstu árin hafi æfingarnar ekki verið sérstaklega markvissar.
Mér fannst – og finnst enn – eitthvað heillandi við það að geta farið langar vegalengdir fyrir eigin afli á hjóli. Það er líka einstaklega skemmtilegt að uppgötva nýjar, fáfarnar leiðir eða hjóla í góðum félagsskap.
Samstarfið – Hvenær hófst samstarf þitt við Örninn og hvað hefur það gert fyrir þig?
Samstarfið hófst vorið 2012. Ég byrjaði að æfa þríþraut haustið 2010 og tók þátt í Smáþjóðaleikunum árið 2011 í tímatökuhjólreiðum. Eftir það kviknaði löngunin til að æfa markvissar og setja mér skýr keppnismarkmið. Þá kom Örninn sterkur inn sem samstarfsaðili.
Með stuðningi Arnarins fékk ég aðgang að besta mögulega búnaðinum fyrir hjólreiðar og þríþraut, sem skipti gríðarlega miklu máli. Það varð upphafið að fjölmörgum Íslandsmeistaratitlum.
Vörurnar – Hvaða vörur ertu með frá okkur og hver er uppáhaldsvaran þín eða hverjar eru uppáhaldsvörurnar þínar frá Erninum?
Ég á fimm mismunandi Trek hjól. Mér finnst skemmtilegast að fara langa túra á götuhjólinu mínu, Trek Madone, og tímatökuhjólinu, Trek Speed Concept, yfir sumartímann.Hin hjólin nota ég meira á veturna eða þegar ég hjóla leiðir sem eru ekki malbikaðar. Trek Checkpoint gravelhjólið er líklega það hjól sem býður upp á mesta fjölbreytni, þar sem það hentar jafnt á malbik og möl og hefur því ótrúlega fjölbreytta notkunarmöguleika.
Markmið – Hver eru markmið þín í íþróttinni og hvað er fram undan hjá þér?
Markmið mín í dag eru fyrst og fremst að halda góðri heilsu og njóta þess að geta hjólað mikið og langt.Ég tek enn þátt í þríþrautarkeppnum og tímatökukeppnum vegna þess að mér finnst það skemmtilegt. Með hækkandi aldri verða markmið um verðlaun kannski ekki jafn háleit og áður, en ég stefni engu að síður á að halda áfram að keppa erlendis í aldursflokki í lengri þríþrautarkeppnum.
Annað – Ef það er eitthvað fleira skemmtilegt sem þú vilt koma á framfæri er þér velkomið að bæta því við.
Mér fannst einstaklega skemmtilegt þegar Örninn–Trek liðið vann WOW Cyclothon árið 2015. Það var allt önnur upplifun að taka þátt í liðakeppni en að keppa sem einstaklingur.
